Archives: Portfolio

63 Pokfulam
63 Pokfulam【驗樓專家】驗樓報告重點： 單睇屋苑範圍就知則師就用料方面花左啲「心思」，但手工配唔配合到呢？就要睇承建商監工功夫足唔足夠！ 驗收單位乾淨企理，而屋苑外牆採用幕牆玻璃減少貼紙皮石嘅手工，但鋁冚明顯有不同程度嘅甩色及崩花，尤其是低層住戶，統一安排吊船將所有外牆鋁冚省灰執色。玻璃飾面問題不大，只有輕微花痕，而且不明顯。 單位室內鋪砌算係中上水平，只有少部分單位有空鼓嘅現象，位置靠近露台。露台及工作平台牆身紙皮石鋪砌亦十分妥當，甚少空鼓，但掃口有明顯缺口及磚面有鏽漬。 要挑剔係室內門飾面，比較多壓痕，而門腳有披口嘅現象。踢腳板唧膠有離罅嘅現象，但不嚴重。另外，最差就係開放式廚房水龍頭及星盆嘅安裝，不單只水龍頭鬆，而且隔氣滿水口喉管接駁都有心滲漏，明顯承建商試水唔夠仔細。浴室主燈設計欠缺周詳，燈光非常昏暗，假天花石膏板油漆非常薄，有透底嘅現象。 發展項目承建商：九建工程有限公司 地點：薄扶林道63號
了解更多
Terrace Concerto 翠鳴臺
Terrace Concerto 翠鳴臺【驗樓專家】驗樓報告重點： 六月份主要驗收房協嘅屋苑包括翠鳴臺、翠嶺峰及綠怡雅苑，個屋苑都有唔同嘅承建商建造，各有「千秋」，但都唔係平時私人屋苑用開嘅承建商。 油漆批盪算係中規中矩，批盪空鼓比較多，算係意料之內嘅事。相比之下外牆紙皮石，不單只掃口不飽滿嘅現象，而且喉碼窿有缺口，有滲水隱患，所以承建商必須要處理。 至於窗戶玻璃，雖則崩花並不多，但部分設計欠恰當，有乜理由冷氣機喺正要中間，而冷氣機頂有加一隻窗，雖則唔關承建商事，成件事好唔合理。另外，露台掩門有虛位及漏風現象，主要係因為門框壓膠擺位欠恰當，導致關閉時啲力不能平均壓實門扇，所以要好好調整一下。 發展項目承建商：新福港營造有限公司 地點：鳴琴路3號
了解更多
Centra Horizon 海日灣II
Centra Horizon 海日灣II【驗樓專家】驗樓報告重點： 海日灣II比預期早咗半年收貨， 咁趕之下究竟質素如何呢？ 疫情都比較嚴重，所以業主尤其關心隔氣嘅設施，為咗避免隔氣乾涸，業主應入屋後，最好先倒水落地台去水口，避免開冷氣或抽風設備連帶屋外細菌異味而抽入屋內，但千防萬防萬萬唔到承建商漏裝隔氣，導成間屋異味濃烈，尤其是係近平台嘅單位，呢個係一個嚴重嘅defect。另一個重災區就係浴室潔具坐廁水箱，全部未清沙泥，導致坐廁內一條條黃色沙泥烘十分令人側目。 屋苑採用幕牆玻璃及鋁冚，雖則檢查項目較少，但玻璃污漬、水烘及膠漬甚多，令檢查玻璃崩花非常困難。窗框槽去水口亦欠造，導致積水未能排走。另外，浴室外牆嘅喉碼窿縫隙較大，需要抆灰避免滲水入紙皮石內。 其他項目，如：鋪磚、牆身批盪、油漆等，尚算中上。 發展項目承建商：顯利工程有限公司 地點：創新路 18 號
了解更多
Mount Verdant 翠嶺峰
Mount Verdant 翠嶺峰【驗樓專家】驗樓報告重點： 六月份有好多房協嘅盤開始陸陸續續收樓，包括綠怡雅苑、 翠鳴臺及翠嶺峰， 怛分別採用不同嘅承建商，各位業主可以比較一下。  先來評價一下翠嶺峰，入屋之前就知道係一場硬仗， 單睇牆身天花油漆批盪，就知道誠意去到邊。除咗油漆粗糙多數掃痕，牆身、陣、天花都有大範圍嘅空鼓，空鼓嘅程度甚至乎要剷到石屎面，近年來好少發現咁大面積嘅空鼓。 第二係外牆紙皮石、過牆窿、喉碼窿等都有唔同程度嘅缺口或者掃口不飽滿嘅情況，甚至乎上下樓板接縫位膠都有離口。呢啲位置一定會攝水，繼而紙皮石空鼓，其後滲水只係遲早嘅問題，各業主應多加留意。而室內鋪磚上算可以，部分窗台邊、牆身磁磚空鼓。  另外掩門、窗框、欄杆等鋁飾面都有大大小小嘅崩花，需要執灰重新噴油。 呢個設計映日灣嘅Studio Flat已經出現過，唔通呢期興？其實按常理都知，抽油煙機排風應該排出室外，但偏偏向室內排，不如唔好裝抽油煙機好過啦！講返轉頭，望一望開放式廚房假天花其實有足夠位置及條件比風喉過，但唔關承建商事，設計問題唔當係Defect，業主可能要自行加裝隔油紙。 發展項目承建商：精進建築有限公司 地點：翠嶺路48號
了解更多
eResidence 煥然懿居
eResidence 煥然懿居【驗樓專家】驗樓報告重點： 近期Downtown 38、煥然懿居同屬市建局重建項目，正所謂冇比較冇傷害 ，相信唔少業主都感受到，但亦都有讚嘅設施。 雖然飾面污漬佔驗樓其中部一個項目，但單位嘅整潔度會直接影響業主嘅觀感。煥然懿居承建商真係有待改善， 地台磚面多油漬，部分門扇窗面都有省灰漬，希望喺細清程序多加留意。 先講窗玻璃，不但多崩花，而且崩嘅有一定深程度，加上有雜質，包括：氣泡及白烘，保護及檢查應多加留意。窗框窗扇崩花多，亦需要重新省灰噴油。窗台石亦見空鼓，需要「打針」處理。 另外，開放式廚房抽油煙機風喉有漏風現象，出現嘅位置喺機身及風喉嘅接駁位，需要打開生口檢查。 石膏板假天花並冇設計生口，如果風喉有破損或者要更換係非常困難做到。 露台外牆紙皮石有空鼓而掃口唔夠飽滿現象， 但有值得讚既設備，天花頂加咗一個可升降嘅晾衫架係私人屋苑少見嘅。不過浴室設計就略嫌欠缺周詳， 浴屏門鉸位採用有缺口嘅膠條而唔係全包邊，而且浴屏門檻冇做斜水U槽，淋浴時會有滲漏到地台嘅情況。 發展項目承建商：金門建築有限公司 地點：鶴園街8號
了解更多
West Park
West Park【驗樓專家】驗樓報告重點： West Park 係由酒店改裝成住宅發售，內籠以法式風格設計，廚櫃飾面有別於其他屋苑嘅顏色， 鍾唔鍾意其實就見意見仁見智。屋苑承建商屬於少見， 手工屬於中規中矩 。 單位由窗講起，窗戶玻璃少崩花，但窗扇壓條有虛位、起級、離罅嘅現象，部分窗框灰抆灰粗糙，甚至漏做。所有單位煤氣熱水爐掣面都係鬆，固定唔到宜唧膠代替。由於廚櫃飾面過於「特別」，崩花執色起來都比較覺眼，所以承建商保護一定要比其他木紋飾面更要做得好。櫃門安裝比較馬虎，不單只有櫃門虛位、起級、刮門等少見問題，部分櫃門搲手亦比較鬆。 浴室潔具方面，洗手盆水龍頭虛位，導致滲漏。廁所沖厠掣亦有回彈不良嘅現象。單位如浴室地櫃枱面石與浴屏碰口邊緣宜唧膠防止攝水入櫃邊，導致側板發霉。部分開放式廚房洗手盆隔氣駁口亦有滲漏。 值得一提，消防系統設計及擺位略欠美觀性及人性化，包括消防花灑外露及花灑喉佔據廚櫃大部分位置。浴室企缸應採用防滑磚或鞋面，減少使用者滑倒嘅可能性。 發展項目承建商：寶倡工程有限公司 地點：通州街256號
了解更多
Downtown 38
Downtown 38【驗樓專家】驗樓報告重點： Downtown 38係由新鴻基旗下嘅承建商興建，當然手工質素有一定嘅保證， 亦都與最近白石角雲匯不相伯仲。屋苑主打開放式廚房，無論係三房抑或兩房亦如是。值得一讚嘅驗收項目係鋁窗掩門嘅玻璃， 極少崩花及氣泡， 唧膠(窗框外瓦更換後忘記補膠)及防水膠邊安裝妥當，無明顯鬆脫。窗扇門扇亦冇虛位， 並且冇發現任何滲漏及漏風嘅現象，只係部分鋁框及壓條有崩花及彎曲現象。 另外，鋪磚亦無不妥，只係發現少量空鼓及欠掃口及藏水嘅問題。平台單位平台地台斜水嚴重不足，導致地台床藏水，雨季容易滋生蚊蟲。 全部檢驗單位之中發現有一個同樣問題，浴室嘅洗手盆龍頭虛位，導致滲漏入地櫃(如果驚師傅收爆洗手盆)，應在水龍頭邊唧膠固定代替。 另一個值得提嘅就係承建商「貼心」嘅舉動，將所有天花石膏板螺絲全部抆灰，導致唔能夠打開生口檢查，抽油煙機風喉、喉管等設施未能檢查(不禁會問一個問題：生口唔能夠打開叫咩生口？)。 發展項目承建商：駿輝建築有限公司 地點：北帝街38號
了解更多
Solaria 嘉熙
Solaria 嘉熙【驗樓專家】驗樓報告重點： 三、四月雲匯及嘉熙參唔多時收樓及驗收，質素雖則不能直接比較，但論工程監督卻有高低之分。 屋苑整體而言中規中矩，防漏功夫及舖砌手工合格，但整潔度及飾面保護方面認真「麻麻地」。門檻石、枱面石以及櫃身多處崩花，而且執色功夫粗糙馬虎。尤其是櫃飾面採用焗漆，崩花執色相當明顯。 另外，整個單位，建築廢料通處都有，牆身、窗框、電器、櫃內水喉等都有大大少少「泥屎」黐在表面(其實只要在未乾之前有手尾抹一抹)，增加清處造成的崩花。 發展項目承建商：Gammon Engineering & Construction Company Limited (金門) 地點：科進路16號
了解更多
St. Martin 雲滙
St. Martin 雲滙【驗樓專家】驗樓報告重點： 今年繼晉海後，另一個相同發展商的樓盤，但不同承建商處理，驗樓質素會唔會有分別呢？ 呢個屋苑飾面上處理比較好，無論櫃、門扇及玻璃都甚少崩花。但舖磚方面就扣分不少，尤其是大單位廚房工作間，幾乎腳線全部空鼓，浴室、露台及工作平台地台瓦掃口欠飽滿。開放式單位，業主則留意抽油煙機﹐不少單位假天花內風喉有斷裂及缺口。 最近﹐開放式廚房的單位都驗出抽油煙風喉斷裂，各個承建商認真要考慮有關假天花的喉管擺位，避免因「難落手」導致上述的問題出現。 發展項目承建商：新輝城建工程有限公限司 地點：科進路12號
了解更多
Twin Regency 映御
Twin Regency 映御【驗樓專家】驗樓報告重點： 映御驗樓質手素中游位置，問題集中於窗框防水膠條及門扇緊閉程度。無論是窗扇及掩門框都有鬆脫及過短的情況，易容透過缺口攝水入室內。工作平台掩門關閉時有虛位，同樣易容透過罅隙攝水入室內。 另外，體現工程監督質素，就要留意地台分隔條有沒有起級，因為木板碰瓷磚以及中間的分隔條，若能造平，證明幾個行頭師傅都有跟標準做，亦考驗監督有沒有偷懶。 發展項目承建商：新輝城建工程有限公限司 地點：德業街11號
了解更多

驗樓專家是來自香港工程業的專業團隊，從事相關工作超過10年。驗樓服務踏入第5年，檢驗超過150個屋苑，合共850以上名客户(截止2019年)。驗樓專家是你專業信心的保證，歡迎查詢:（852）5545 1740。

Follow Us :

Extra links

Newsletter

想了解更驗樓小貼士及優惠，歡迎留下您的電郵地址。

Copyright 2015 Professional Property Inspector Ltd All Rights Reserved.