C Grade – 驗樓專家

Posted on 27/03/2022
HKPPI 驗樓專家

Enchantee 尚璽

Enchantee 尚璽【驗樓專家】驗樓報告重點：【驗樓專家 HKPPI】總結 Enchantee 尚璽驗樓報告重點：最近好多市區樓盤陸陸續續收樓，以往經驗臨近農曆新年前收樓，反映手工都係強差人意，正正呢個樓盤前後都有對比。新年前檢驗尚璽嘅時候，真係非常驚嚇，室內出現大量昆蟲屍體都冇清理，唔明點解好大都係新樓，狀態好似好耐冇租出去噤。昆蟲除咗從窗外飛入，主要原因係由於地台去水隔氣乾涸，冇咗水封，昆蟲就從喉管飛入室內，所以唔難發現一入屋或開抽油煙機時，聞到異味。講返重點，手工瑕疵主要出係：1.幕牆玻璃框唧膠馬虎；2.潔具安裝粗疏 3.牆身批盪油漆粗糙。窗框無論室內外唧膠，唔係漏唧，就係唧得唔夠飽滿(可能外行人都唧得靚過佢)，極度影響防漏效果，而且框又多崩花，簡直不堪入目。潔具安裝方面又係另一個重災區，單單鋅盆位置已出現好幾種問題，包括：水龍頭安裝鬆脫；盆邊欠唧膠；上水掣未能扭開等等。最離譜，係鋅盆去水用大陸制式，冇左隔氣功能。另一方面，浴室座廁上水掣又漏水，底又欠唧膠收口，而糞渠幅牆地台位置貼少塊磚。地台一濕水，就流入果缺口，影響防水層嘅耐用。至於批盪油漆手工，都係裂紋較多、掃痕明顯、新舊油色差大。發展項目承建商：#漢達建築有限公司地點：#大角咀道247號

了解更多

Posted on 18/08/2021
HKPPI 驗樓專家

L’Aquatique 逸璟．龍灣

L'Aquatique 逸璟．龍灣【驗樓專家】驗樓報告重點：七、八月一般係驗樓旺季，由凱匯、珺瓏灣、家壹、本木都陸陸續續開始驗收，其實大型承建商處理瑕疵基本上問題不大，亦知現時驗樓Take Defects Standard去到邊，控制瑕疵喺飾面崩花上。當然有部分承建商對瑕疵處理程度有待改善，驗收逸璟龍灣嘅單位可見一斑。整個單位瑕疵量比較多，甚至乎用「整一半唔整一半嚟」嚟形容，浴室多樣部件都有安裝鬆脫嘅瑕疵，包括：花灑架、水龍頭、拉手、熱水爐控制器等等，甚至乎輕輕一推，已經喺成個跌出嚟。其實只要地盤監工輕輕一推，唔難發現此類型瑕疵。另外，直得一提，坐廁排污渠穿地台窿應該填封，避免地台去水長期積聚，削弱地台防水層嘅保護性。假天花內風喉水管接駁冇問題，但其中一個單位打開假天花時，竟然有成條廢氣水喉跌咗落嚟，好彩冇人受傷，其實好多師傅順手留低一啲建築廢料煙頭，都係常見嘅現象，但咁大條水管都係第一次見。牆身批盪及窗戶部件，瑕疵亦係重災區，油漆不單止粗糙、多污漬及掃口，批盪出現大量裂紋及空股。玻璃崩花多，同時有大量焊跡，需要打磨及更換，避免影響玻璃安全性。露台欄河扶手易出現多處銹跡，證明不銹鋼並唔係「不銹」。當然仲有好多不同部件瑕疵，不一一列舉，業主自行檢亦不難發現。發展項目承建商：林陳簡建築師有限公司地點：青山公路青龍頭段108 號

了解更多

Posted on 23/02/2021
HKPPI 驗樓專家

Ontolo 朗濤

Ontolo 朗濤【驗樓專家】驗樓報告重點：驗收單位以兩房開則配梗廚，設有工作平台及露台，瑕疵(Defects) 遍佈各工種，僅櫃安裝、木地板舖設及室內磚舖砌整體較好。玻璃簡直花過花面貓，尤其係掩門及隔音玻璃，老實講冇可能交收前驗收都過關，部分花痕長度超過200mm，非常明顯，不過唯一好嘅地方崩點唔多。另外，窗戶及戶外門冇無論飾面及部件，都有不同程度崩花及鬆脫現象，需要重新噴色及安裝。複合板地台與「波打石」碰口都有分隔條，但往往都有起級及彎曲情況，非常容易絆腳，此項尤其考驗師傅手工及監工檢查得究唔究仔細。而「波打石」石材出現斷裂及崩花亦唔難發現。潔具安裝方面亦欠馬虎，洗手盆水龍頭每隻隻都欠扭緊，而部分隔氣接駁及洗手機排水接駁都有滲漏。批盪及油漆都唔好得去邊，天花牆身批盪都有長裂紋而且非常粗糙，油漆掃痕亦非常明顯。發展項目承建商：Gammon Engineering & Construction Company Limited 地點：科研路7號

了解更多

Posted on 03/10/2020
HKPPI 驗樓專家

Poggibonsi 意堤

Poggibonsi 意堤【驗樓專家】驗樓報告重點：位於愉景灣竟然睇環境相當唔錯，可惜今次唔係嚟relax係嚟 flat check。整體單位存在大問題，包括：玻璃崩花多、外牆紙皮石空鼓、浴室潔具安裝欠妥、假天花發霉等等。玻璃崩花嚴重，尤其係廚房鋁窗，部分修復過嘅玻璃出現哈哈鏡現象。外牆紙皮石亦有不少空鼓，同樣廚房尤其嚴重，部分空鼓紙皮石甚至有脫落危險，須儘快處理，掃口欠飽滿問題亦較多。廚房係整個單位扣分最嚴重嘅部分，抽油煙機不單止風喉鬆脫，甚至連開關按鈕到漏裝，認真唔小心。另外，枱面石黏貼欠穩固導，致整塊枱面石可以上下搖晃。部分櫃嘅收邊亦不理想，唧膠離罅及發霉情況，看見歲月嘅痕跡。另一個defect重災區係浴室，石膏板假天花頂已經發曬霉，潔具安裝亦欠妥，包括：洗手盆水龍頭有鬆脫、廁所栓口板及沖厠按鈕亦有虛位等現象。發展項目承建商：昇柏營造廠( 工程) 有限公司地點：堤畔徑3 號

了解更多

Posted on 06/07/2020
HKPPI 驗樓專家

Terrace Concerto 翠鳴臺

Terrace Concerto 翠鳴臺【驗樓專家】驗樓報告重點：六月份主要驗收房協嘅屋苑包括翠鳴臺、翠嶺峰及綠怡雅苑，個屋苑都有唔同嘅承建商建造，各有「千秋」，但都唔係平時私人屋苑用開嘅承建商。油漆批盪算係中規中矩，批盪空鼓比較多，算係意料之內嘅事。相比之下外牆紙皮石，不單只掃口不飽滿嘅現象，而且喉碼窿有缺口，有滲水隱患，所以承建商必須要處理。至於窗戶玻璃，雖則崩花並不多，但部分設計欠恰當，有乜理由冷氣機喺正要中間，而冷氣機頂有加一隻窗，雖則唔關承建商事，成件事好唔合理。另外，露台掩門有虛位及漏風現象，主要係因為門框壓膠擺位欠恰當，導致關閉時啲力不能平均壓實門扇，所以要好好調整一下。發展項目承建商：新福港營造有限公司地點：鳴琴路3號

了解更多

Posted on 23/06/2020
HKPPI 驗樓專家

Mount Verdant 翠嶺峰

Mount Verdant 翠嶺峰【驗樓專家】驗樓報告重點：六月份有好多房協嘅盤開始陸陸續續收樓，包括綠怡雅苑、翠鳴臺及翠嶺峰，怛分別採用不同嘅承建商，各位業主可以比較一下。先來評價一下翠嶺峰，入屋之前就知道係一場硬仗，單睇牆身天花油漆批盪，就知道誠意去到邊。除咗油漆粗糙多數掃痕，牆身、陣、天花都有大範圍嘅空鼓，空鼓嘅程度甚至乎要剷到石屎面，近年來好少發現咁大面積嘅空鼓。第二係外牆紙皮石、過牆窿、喉碼窿等都有唔同程度嘅缺口或者掃口不飽滿嘅情況，甚至乎上下樓板接縫位膠都有離口。呢啲位置一定會攝水，繼而紙皮石空鼓，其後滲水只係遲早嘅問題，各業主應多加留意。而室內鋪磚上算可以，部分窗台邊、牆身磁磚空鼓。另外掩門、窗框、欄杆等鋁飾面都有大大小小嘅崩花，需要執灰重新噴油。呢個設計映日灣嘅Studio Flat已經出現過，唔通呢期興？其實按常理都知，抽油煙機排風應該排出室外，但偏偏向室內排，不如唔好裝抽油煙機好過啦！講返轉頭，望一望開放式廚房假天花其實有足夠位置及條件比風喉過，但唔關承建商事，設計問題唔當係Defect，業主可能要自行加裝隔油紙。發展項目承建商：精進建築有限公司地點：翠嶺路48號

了解更多

Posted on 03/06/2020
HKPPI 驗樓專家

West Park

West Park【驗樓專家】驗樓報告重點： West Park 係由酒店改裝成住宅發售，內籠以法式風格設計，廚櫃飾面有別於其他屋苑嘅顏色，鍾唔鍾意其實就見意見仁見智。屋苑承建商屬於少見，手工屬於中規中矩。單位由窗講起，窗戶玻璃少崩花，但窗扇壓條有虛位、起級、離罅嘅現象，部分窗框灰抆灰粗糙，甚至漏做。所有單位煤氣熱水爐掣面都係鬆，固定唔到宜唧膠代替。由於廚櫃飾面過於「特別」，崩花執色起來都比較覺眼，所以承建商保護一定要比其他木紋飾面更要做得好。櫃門安裝比較馬虎，不單只有櫃門虛位、起級、刮門等少見問題，部分櫃門搲手亦比較鬆。浴室潔具方面，洗手盆水龍頭虛位，導致滲漏。廁所沖厠掣亦有回彈不良嘅現象。單位如浴室地櫃枱面石與浴屏碰口邊緣宜唧膠防止攝水入櫃邊，導致側板發霉。部分開放式廚房洗手盆隔氣駁口亦有滲漏。值得一提，消防系統設計及擺位略欠美觀性及人性化，包括消防花灑外露及花灑喉佔據廚櫃大部分位置。浴室企缸應採用防滑磚或鞋面，減少使用者滑倒嘅可能性。發展項目承建商：寶倡工程有限公司地點：通州街256號

了解更多

Posted on 24/03/2020
HKPPI 驗樓專家

Grand Yoho

Grand Yoho【驗樓專家】驗樓報告重點：量多導致工程監督質素下降，好像有「必然」關係。Grand Yoho屬於大型屋苑，更顯工程監督重要，如果某幾個單位要上電視就代表屋苑整體，就有少許武斷。返回正題，舖磚、窗戶、石材及油漆批盪都是扣分的項目。舖磚Defects例牌都是空鼓及掃口不飽滿的問題，而且較多出現外牆及露台天花，不竟都是現場舖砌，總有手誤。浴室及廚房石材造晶化前，應檢查清楚有沒有崩花及刮痕，避免晶化後藏於晶面內，外觀相當礙眼。另外，窗框鋁條夾口離罅現象多，容易「攝水」。牆身油漆批洫中規中距，掃痕明顯及裂紋亦較多。發展項目承建商：新輝城建工程有限公限司地點：朗日路9號

了解更多

Posted on 06/03/2020
HKPPI 驗樓專家

Stars By The Harbour 維港．星岸

Stars By The Harbour 維港．星岸【驗樓專家】驗樓報告重點：相信業主對這個屋苑手工都「心裡有數」，業主預期都會裝修，驗樓缺損部分其實可以忽略。主要環繞三大範疇：門窗飾面及安裝、喉管接駁及罅隙的處理。以大門為例，飾面多崩花、防盜配件未能運作、封口線頂則唧膠離口等。窗框夾口多罅隙，窗簷罅隙位置有滲水，甚至出現生青苔。洗水盆及鋅盆隔氣接駁位置虛位，有滲漏。露台趟門基仔(石壆)與路軌罅隙唧膠離口藏水。罅隙如果唧膠或填補物料手工馬虎，絕對有機會造成滲漏及保養問題，加速損壞保護層風險。發展項目承建商：精進建築有限公司地點：紅鸞道7號

了解更多

Posted on 02/03/2020
HKPPI 驗樓專家

Capri

Capri【驗樓專家】驗樓報告重點：整個屋苑，越大號座數質素越參差，各個大項目都扣大分，包窗戶、油漆批盪、舖磚、潔具等。窗玻璃除左一般崩花之外，某幾個位置(尤其是面向天井)還出現很多焊漬，增加爆裂的風險。油漆不單只粗糙不平滑，而且批盪出現多條裂紋及空鼓。露台舖磚斜水不足，甚至出現「倒Fall」，牆身紙皮石又有空鼓。潔具是另一個重災區，洗水盆好幾個龍頭及開關出現虛位，導致滲水入櫃。發展項目承建商：Gammon Engineering & Construction Company Limited 地點：唐賢街33號

了解更多